अपन मिथिला धाम

सब सँ सुंदर अपन ई धरती,
बाबा विद्यापति केर गाम यौ,
सब मिल करू प्रणाम फेर सँ,
अपन मिथिला धाम यौ ||1||

जतय ऋषि श्रेष्ठ गौतम नामी,
विदु में मंडन ओतय गामी,
भारती केर प्रतिभा ओहि ठाम यौ,
सब मिल करू प्रणाम फेर सँ,
अपन मिथिला धाम यौ ||2||

माछ-मखानक जतय रीत अछि,
पानक लाली अपन प्रीत अछि,
सीता बहिन आ पाहुन राम यौ,
सब मिल करू प्रणाम फेर सँ,
अपन मिथिला धाम यौ ||3||

कोशी-कमला जतय बहै अछि,
सुग्गा जतय बेद कहय अछि,
सरिसब आ बिस्फी सन् गाम यौ,
सब मिल करू प्रणाम फेर सँ,
अपन मिथिला धाम यौ ||4||

शंकर रूप अयाचिक आँगन,
उगना रूप विद्यापतिक प्राँगण,
ई दूनू रूप धय ऐला सदाशिव,
अपनहिं मिथिला गाम यौ,
सब मिल करू प्रणाम फेर सँ,
अपन मिथिला धाम यौ ……
सब मिल करू प्रणाम फेर सँ,
अपन मिथिला धाम यौ ||5||

•••••••• मनीष झा